آذربایجان دموکرات فرقه سینین بیاناتی

آذربایجان دموکرات فرقه سینین بیاناتی     ۲۱ آذر حرکاتینین۶۰ ایلی تمام اولدو. هم ۲۱ آذر حرکاتی همده او دؤوردن کئچن۶۰ ایلده ایراندا و دونیادا طالع یوکلو حادثه لر باش وئردی. آذربایجان خالقی ژاندارم و مولکه دار ظلمونه، ایرانین مرتجع قوه لرینین رضاخان دیکتاتوراسینی یئنیدن برپا ائتمک نیتینه قارشی، اولوم- دیریم مبارزه سینه باشلادی. همین مبارزه یه رهبرلیک ائتمک مقصدی ایله عموم ملی خصوصیت داشییان، آذربایجان دموکرات فرقه سی تشکیل ائدیلدی. انقلابی مبارزه یه تام حاضر اولان آذربایجان خالقینی قیسا بیر مدتده سفربر ائتدی. آذربایجان خالقینین ملی و دموکراتیک حرکاتی ۲۱ آذر ۱۳۲٤- جی ایلده تام غلبه ایله نتیجه لندی.      ۲۱ آذر حرکاتی سلاحلی عصیان کیمی تاریخه دوشسه ده، اورمو حادثه لرینی استثناء ائتمکله، گئنیش مقیاسلی قانلی دؤیوش باش وئرمه دی. اونا گؤره باش وئرمه دی کی، تهران اؤزونو ایتیرمیشدی. آذربایجاندا تهران مرتجعلرینین منافعلرینی مدافعه ائدن قووه لر خالق عموم حرکاتیندان قورخویا دوشه رک، تسلیم اولماق مجبوریتینده قالدیلار.      ۲۱ آذر حرکاتینین غلبه سی، آذربایجاندا ملی حکومتین تشکیل ائدیلمه سینی آسانلاشدیردی. ملی حکومت آذربایجان دموکرات فرقه سینین رهبرلیی ایله سیاسی، اجتماعی و اقتصادی اصلاحاتلار آپاردی.      آذربایجان خالقینا صداقتله خدمت ائتمک ایسته ین اردو ضابیطلری و دؤلت مامورلارینین آذربایجاندا فعالیت گؤسترمه سی اوچون گئنیش امکان یاراندی. دموکراتیک سئچکی کئچیریلدی. آذربایجان ملی مجلسی ایشه باشلادی. ملی حکومتین ترکبیی و اونون دؤلت پراقراماسینی تصئیق ائتدی. آذربایجان خالقینین انقلابی نائلیتلرینی قوروماق اوچون، فدائی دسته لری ایله یآناشی، یئنی ملی اوردو یاراندی. ژاندارم و پلیس دستگاهی لغو ائدیلدی. شهرو کندلرده اهالینین تهلوکه سیزلیینی قوروماق مقصدی ایله ملی نظمیه تشکیلاتی فعالیته باشلادی.      آذربایجان دیلی رسمی دؤلت دیلی اعلان ائدیلدی. دؤلت اداره لرینده یازی آذربایجان دیلینده آپاریلدی. ابتدایی مکتبلردن باشلایاراق، عالی مکتبلره قدر تدریس آذربایجان دیلینده آپاریلدی. شهرلرین سیماسی ده یشیلدی، خیابانلارا و کوچه لره آسفالت دؤشندی. شهرلر آراسی یوللار سرعتله تعمیر اولوندو. کندلی- مالیک مناسبتلرینی تنظیم ائدن قانون قبول ائدیلدی. خالصه تورپاقلاری پولسوز اولاراق، کند اهالیسی آراسیندا بؤلوندو. اهالییه طبی خدمت اوچون شهر و کندلرده طب منطقه لری یاراندی. صاحب سیز اوشاقلاری دؤلت حمایه سی ایله احاطه ائتمک اوچون اوشاق ائولری آچیلدی. آذربایجان دموکرات فرقه سی و ملی حکومتین ادبییاتا، اینجه صنعته و عمومیتله ملی مدنیته قایغیسی نتیجه سینده ایران تاریخینده ایلک دفعه اولاراق، دؤلت فلارمونیاسی و دؤلت تئاتری ایشه باشلادی.      بو مدنیت مرکزلرینین شعبه لری آذربایجانین شهرلرینده یارادیلدی. ادبیات و شعرین انکیشاف ائتدیریلمه سی اوچون، شاعرلر مجلیسی تشکیل ائدیلدی. شاعرلر مجلسینین متبوع اورقانی نشره باشلادی. تبریز، اورمو، زنگان و اردبیلده چوخ سایلی قزئتلر نشر ائدیلدی. تبریز رادیوسو تاسیس ائدیلدی. بو کوتله وی اینفورماسییا واسطه لری، تهران مرتجعلرینین آذربایجانا قارشی یاغدیردیقلاری تهمت و افترالاری افشا ائتمکله یاناشی آذربایجاندا آپاریلان مترقی اصلاحاتلارین گئدیشینی اؤز صحیفه لرینده عکس ائتدیریردی.      انقلابلار تاریخی، دفعه لرله ثبوتا یئتیرمیش دیر کی، خالقین آخار انرژینی سفربر ائدیلدیکده، انقلابی ده ییشیکلیکلرین سرعتله حیاتا کئچیریلیر. آذربایجان دموکرات فرقه سی محض بو استقامتده خالقی سفربر ائتدی و بیر ایل عرضینده ایران تاریخینده مثلی گؤرونمه ین معجزه لر یاراتدی. ائله معجزه لر کی اونون ایزینی تهران مرتجعلری آذربایجان خالقینین دوشونجه و شعوروندان سیله بیلمه دی. عکسینه بو نائلیتلر سینه دن سینه یه، نسیلدن نسیله کئچره ک، خالق داستانلارینا چئوریلدی. ائله داستانلار کی، بوگونده خالق آراسیندا گئنیش یایلیر.      آذربایجان دموکرات فرقه سی و آذربایجان ملی حکومتی یئنی دؤوره و یئنی شرایطه اویغون اولاراق، ملی مبارزه بایراغینا چئوریلیر. خالق، خصوصی ایله ضیالی گنجلر بو بایراق آلتیندا بیرلشیرلر، ملی حقوقلار اوغروندا مبارزه آپاریرلار.      بو مبارزه ده ایره لی سورولن شعارلار مختلف اولسادا، اساس و آپاریجی شعار فدرال دؤلت شعاری دیر. دئمک اولار کی مترقی قووه لرین عمومی شعاری دیر. ائله بیر شعار کی، اونون حیاتا کئچیریلمه سی ایله واحد ایران چرچیوه سینده ملتلرین تعیین مقدرات حقوقو رئاللاشیر.      دونیانین قلاباللاشدیغی بیر زامان ملی آزادلیق حرکاتینین غلبه سی اوچون گئنیش امکان و الوئریشلی شرایط یارانیر. آزادلیق سئور قووه لرین حرکت بیرلیی بو غلبه نین تامین ائدیلمه سی اوچون مهم عامل دیر. آذربایجان دموکرات فرقه سی ۱۳۸٤- جی ایلین آذر آیی