آذربایجان ملی حکومتینین اعلامیه سی

	آذربایجان ملی حکومتینین اعلامیه سی   آذربایجان ملی مجلیسینین انتخاب ائتدییی آذربایجان ملی دولتی ایرانین استقلال و تمامیتینی حفظ ائتمکله برابر، ایشه باشلادیغینی بو واسطه ایله بوتون خالقا اعلام ائدیر؛ بو اعلامیه منتشر اولان گوندن (۲۱ آذر ۱۳۲٤) اعتباراً، مالکیت خصوصی محفوظ اولماق شرطی ایله بوتون آذربایجاندا اولان دولت اداره لری ته زه حاکمیتین تحت اختیارینا کئچدییندن، عموم دولت مامورلارینا اوز وظیفه لرینی دوزگونلوک و صداقتله انجام وئرمه لری تاپشیریلیر٠ ته زه دولتین امرلرینه اطاعت ائدیب، اونون دستوری ایله رفتار ائدن کارمندلر اوچون مناسب ایش شرایطی وجودا گه تیریله جک، ایشله مکدن امتناع ائده نلر ایسه کمال احترام ایله ایسته دیکلری یئره گوندریله جکلر٠ آذربایجان ملی حکومتی خالقین سعادت و خوشبخت لییندن اوتری قورولدوغو اوچون، عموم خالقی فعالیته، دوزلویه، آسایش و امنیتی حفظ ائتمه یه، بیر- بیری ایله قـارداشواری یاشـاماغا دعـوت ائدیر٠ امینتی اخلال ائدن و خالقین مال، جان، ناموس و حیثیتینه تجاوز ائله ینلر، همچنین دولت مالینا خیانت الی اوزادیب دولت اداره لریندن سوء استفاده ائدنلر و یا دولت اداره لرینده خرابکارلیق، مسامحه و اوز وظیفه سینده کوتاهلیق ائتمک کیمی خائنانه تشبثلر بروزه وئرنلر ایسه خالقین دشمنی حساب اولونوب، ملت و دولت یانیندا نفرت و انزجار قازانماقدان علاوه، قانونی محکمه واسطه سی ایله مجازات ائدیله جکلر٠ هامیدان خالقا و اولکه یه خدمت و آذربایجانین گه له جه یی یولوندا جدیت گوزله نیر. دولت ایسه اونون شرایطینی وجودا گتیرمه یه چالیشاجاقدیر٠ آذربایجان ملی وزیرلر هیأتی عین زاماندا آذربایجاندا ماموریتلری اولان خارجی دولتلرین دیپلوماسی نماینده لرینه اطلاع وئریر کی، کما فی السابق اونلارین بین الملل قانونلار شرایطینده اولان حق و اختیارلاری کمال دقت و احترام ایله مراعات اولوناجاقدیر. همچنین دموکراتیک دولتلرین اتباع اینین آسایش و امنیتینی حفظ ائتمک یولوندا ملی دولت هئچ بیر فداکارلیقدان خوددارلیق ائتمه یه جکدیر. بوگوندن اعتباراً دولته متعلق اولان منقول، غیر منقول اموال، همچنین نقد و جنس و اعتبار ملی، دولت اختیارینا کئچدییندن، اونلارین ساخلاماغینا موظف اولان دولت مامورلاری، کئچمیشده وئردیکلری تعهد و قبول ائتدیکلری مسئولیت اوزره، اونلاری حفظ و حراست ائتمه یه مجبوردورلار. بو اموالی حیف و میل ائدنلر آغیر جزالارلا مجازات گوره جکلر٠ آرتیق آذربایجان ملی حکومتی تحقق تاپمیش، خالقین اراده سی ایله داخلی ملی دولتیمیز وجودا گه لیب، رسمی صورتده خالقیمیزین آرزو و آمالینی اجرا ائتمه یه باشلامیشدیر. خالق ایسه اوز ملی حکومتینه، وار قوه سی ایله مساعدت گوستریب اونون فعالیتی اوچون مناسب شرایط وجودا گه تیرمه لیدیر٠ یوخاریدا قید ائدیلدییی کیمی دولت وار قوه سی ایله امنیتی حفظ ائتمه یه چالیشیر. اونا گوره خالق اوچون نگران اولماغا هئچ بیر دلیل یوخدور. هر کس اوز ایشینه مشغول اولمالی، اوز ایسته دییی کیمی یاشامالیدیر. بازار باغلاماق، مدرسه لری تعطیل ائدیب، وحشت و اضطراب یاراتماغین معناسی یوخدور. حکومت اوز برنامه سینی خالقین احتیاجاتی اوزه رینده قورموشدور. اونا گوره خالقی ناراحت ائدن حادثه لره یول وئرمییه جکدیر. تصادفی حادثه لره ایسه چوخ تئز بیر زاماندا خاتمه وئریله جک. ماجراجولار، آسایشی اخلال ائدنلر صالح محکمه طرفیندن محاکمه و شدید بیر صورتده مجازات اولوناجاقلار. هئچ بیر پیس اتفاق دوشمیه جکدیر. هئچ کسین حقوقونا تعرض اولمیاجاقدیر. ملی حکومت نظمییه اداره سینی ته زه قوه لر، وسیع اختیارات ایله گوجلندیرمیشدیر. هرج و مرج و ناامنلییه آرتیق میدان وئریلمییه جکدیر. مخصوصاً مدرسه لریمیز همان سابق پروگراملارینی تعقیب ائتمه لی محصللریمیز وار قوه لری ایله امتحانلارا حاضرلاشمالیدیرلار٠ کندلرده و شهرستانلاردا ایسه جدی صورتده ایشه باشلانیب عادی حال وجودا گه له جک و دولت مامورلاری، فدایی لرین و یا غیر مسئول اشخاصین دخالتی اولمادان اوز وظیفه لرینی انجام وئرمه یه قادر اولاجاقلار. فدایی دسته لری انتظام آلتینا آلینیب معین مرکزه تابع اولاجاق، بو واسطه ایله هر بیر سوء حادثه احتمالینین قاباغی آلیناجاقدیر٠ گئدین چالیشین، آسوده اولون ملتیمیزین گه له جه یی و سعادتینی تامین ائتمک اوچون قبول ائتدییمیز وظیفه نی صداقت و ایمانلا انجام وئرین. دولت عموم هموطنلردن بونو طلب ائدیر