خالق فیریدون ایبراهیمىلرى اونوتمادى!

 

خالق فیریدون ایبراهیمىلرى اونوتمادى!
اونلارى اؤز اوره یینده یاشادیر!

آذربایجان خالقى فیرقه میزین و شهامتلى فداییلریمیزین یالنیز آذربایجانا دئییل٫ بوتون ایرانا ائتدییى تاریخى خیدمتلرى ایللرله٫ یوز ایللرله یاد ائده جکدیر.
سئیید جعفر پیشه ورى

آشاغیداکى یازى گجیل سایتیندان آلینیبدیر. (یازى 21 آذرجه ائدیت ائدیلمیشدیر).

عابباسی خلیفه لرینین ایستیبدادینا، پهلوی ظولمونه و ایستئعمارچیلار حؤکمرانلیغینا قارشی آمانسیز موباریزه لرده، آذربایجان خالقی همیشه بیرینجی موباریزه سنگرلرینده اولموشدور. خالقیمیزین آزادلیق اوغروندا موباریزه لرینین ان یاخشی صحیفه لری آذربایجان قهرمان اوغوللارینین قانىیلا یازیلمیشدیر.

ایکینجی دونیا ساواشینین باشلانقیجیندا، آزادلیق سئوه ن خالقیمیز اؤز موباریزه سینی سئیید جعفر پبشه ورىنین رهبرلییی ایله قالدیردی و ایستئعمار قالاسینا هوجوم ائتدی. بیرینجی اولاراق میللی حؤکومت یاراتدی. تئهران حؤکومتی اؤزونون خاریجی آقالارینین حیمایه سیندن ایستیفاده ائدره ک ایستئعمار بایقوشونون قانادی آلتیندا “آذربایجانى فتح ائتمک سفری” آدلانان مشهور ننگین یوروشه باشلادی و آذربایجان خالقینین الده ائتدییی آزادلیق و دئموکراسینی قان ایچینده بوغماغا موفق اولدو.

1325 نجی ایل آذر آییندا هوجوم باشلانان تاریخدن آذربایجان طوفانلی بیر صحنه یه چئوریلدی. بو مئیدانین بیر طرفینده جللادلیق، آلچاقلیق، معنوی دوشگونلوک و ساتقینلیق و باشقا طرفینده ایسه ایگیدلیک، شهامت و آزادلیق اوز- اوزه دوردولار. تئهران حؤکومتینین هله پیش قاراووللاری زنجانا گیرمه میش بوتون شهر قانا بویاندی. آذرین ایکینجی گونو آچیق فیکیرلی روحانی شیخ محمدعلی خوئینی اؤز محضرینده اؤلدورولوب جنازه سی دامدان یئره آتیلدی.

25- 26 آذر گونلریاردبیل اوچون ان آجیناجاقلی خاطیره لر گونو ایدی. شهید اولانلار او قده ر چوخ ایدیلر کی گل- گئت یولو باغلانمیشدی. ایسماعیل عبدالرحیم اوغلو حکاک “ساری ایسماعیل”، دیبائیان و باشقا شهیدلرین جنازه لرینی قارا گروهچولار شهرین هر طرفینده دولاندیریردیلار. اردبیل شهرینین فرمانداری خلیل آذربادگانی “خلیل دائی” نی اوچ دفعه دارا چکدیلر. هر دفعه اونو یاریم جان هوشا گتیریب یئنیدن آسدیلار. او دار آغاجینین دیبینده اوجا سسله دئدی: " من وطن یولوندا اؤلدورولورم، سون غلبه حق و آزادلیقلادیر. یاشاسین آزاد آذربایجان."

آزادلیق دوشمانلاری ایگید شاهسئوه ن قیزی “سریه” نی بئش گون تک جانینا موحاصیره ده موقاویمت ائتدیکدن سونرا نامردجه سینه شهید ائتدیلر. او گولله نرکن " آذربایجان اوغوللاری منیم اینتیقامیمی آلاجاقلار." دئدی.

آذربایجان دئموکرات فیرقه سینین اورمو تشکیلاتینین صدری محمدامین آزاد وطن، نورالله یکانی، معارف رییسی آستارالی شکیبا، حیدری و باشقالاری موباریزه آپاردیلار و بیر بیرینین قوینوندا ابدی یوخویا گئتدیلر.

جینایتکارلار تبریزده، مجلس کیتابخاناسی، میللی اورکئستر، دؤولت فیلارمونیسی و تییاتری غارت ائتدیلر. سرداریله سالار میللىنین میجسسمه لری سیندیریلیب یئرینه ریضاخانین عکسی قویولدو. ایستئعمار هیولاسی آزادلیق فیریشته سینین یئرینه اوتوردو. شاهین قوشونو تبریزه سوخولدوقدان سونرا یئنه مدرسه لر و ایداره لرده دیلیمیزین رسمی ایشله نمه سی یاساق اولدو. 1325 نجی ایل آذرین 22 سینده تبریزده دانیشسرا مئیدانیندا تورکجه کیتابلار قالانیب یاندیریلدی.

میللى حؤکومتین ساوجىسى (پروکورورو٫ دادسیتانى): فیریدون ایبراهیمى

آذربایجان خالقی نین ایگید اوغلو “فریدون ابراهیمی-فیریدون ایبراهیمى” پارلاق اولدوز کیمی باشقا شهیدلر ایچره سینده پارلاییردی.
او آلتی آی ایشکنجه چکدیکدن سونرا دا شجاعتلی، مغرور و تسلیم ائدیلمز قالدی. ایندی او آذربایجان ایگیدینین بییوگرافىسینى خاطیرلادیریق:

فیریدون ایبراهیمی 1297 نجی گونش ایلینده آستارا شهرینده آیدین بیر عاییله ده آنادان اولموشدور. او ایبتدایی تحصیلاتینى آستارادا آلمیشدیر. آتاسی میرزا غنی 1308 نجی ایلده سیاسی ایتتیهاملا حبسه آلینمیش و بیر نئچه ایل زینداندا قالاندان سونرا نهاونده تبعید اولموشدور. او اؤز زامانینین آیدینلاریندان ساییلیردی. فیریدون تئهراندا حوقوق فاکولته سینده تحصیل آلدیغی زامان خوصوصی تدریس، روزنامه لره مقاله یازماق واسیطه سیله اؤزونون گونده لیک یاشاییشینی تامین ائدیردی. ایکینجی دونیا ساواشی ایللرینده او تئهراندا یاییلان روزنامه لردن و هابئله دئموکراتیک مطبوعاتینین بیر نئچه سینده ایشتیراک ائتمیش و چوخ کسرلی سیاسی مقاله لر یازمیشدیر. بو سیرالاردا فیریدون، آذربایجانین اولو اؤنده ری خالقیمیزین اوره یینده یاشایان و میللی حؤکومتین باشچیسی سئیید جعفر پیشه وری ایله تانیش اولور. اونون “آذربایجان دانیشیر” آدلی سیلسیله مقاله لری تاریخی گئچمیشیمیزی بیر داها خاطیرلاداراق، خالقی آزادلیق اوغروندا دؤیوشلرده روحلاندیریردی. او بئله یازیردی: " منیم مقصدیم بودور... اؤز حقیقی مقامی و مووقئعییتینی الده ائتمک اوچون بو گون قییام ائده ن آذربایجان میللتینی آزاد دونیایا تانیتدیرماق ایسته ییرم. بشرییتین مدنییت تاریخینده آذربایجانین نه کیمی بیر مقاما مالیک اولدوغونو گؤسترمک ایسته ییرم..."، او بو مقاله لرده اؤز خالقینین پارلاق تاریخینی خاطیرلاداراق سونسوز بیر ایفتیخار حیسسی ایله قئید ائدیردی: " آذربایجان موقددس ابدی اودلار اؤلکه سیدیر. بو عزیز تورپاغین هر بیر قاریشیندا ایفتیخارلی بابالاریمیزین اونودولماز یادیگاری قالیر. اونون گئچمیشده کی عظمتلی قالالارین قالیقلاری و موقددس آتش لرینین اثرلری بیزیم بؤوک آتالاریمیزین پاک روحو و سارسیلماز اینامینی گؤستریر..."

او آ. د. ف مرکزی کومیته سینین اورگانی اولان “آذربایجان” روزنامه سینین تحریریه هئیتی ایله یاخیندان امکداشلیق ائدیر. 1325 نجی ایلده ایبراهیمی پاریسده تشکیل اولونموش صولح کونفئرانسینا آذربایجان مطبوعاتینین نوماینده سی عونوانیله گؤندریلدی. ایبراهیمی دئموکراتیک مطبوعاتیمیزین گؤرکملی خادیمی کیمی اؤز قلمی، بیلیک و باجاریغی ایله خالق حرکاتین٫ 21 آذر نئهضتینین غلبه سی اوغروندا چالیشمیشدیر. 21 آذر نئهضتینین غلبه سیندن سونرا آذربایجان دئموکرات فیرقه سینین و میللی حؤکومتین باش مدعی العمومی تعیین ائدیلدی.

نهایت 1325نجی ایلین آذر آییندا شاهنشاه قوشونلاری خایینجه سینه آذربایجانا سوخولدوقدان سونرا ایبراهیمی ده حبسه آلینیر. او زینداندا دا موباریزه دن ال اوزمور. نهایت آلتی آی حبسده ساخلانیلدیقدان سونرا، اونو جومعه گونو 1326 نجی ایل خورداد آیینین بیرینده تبریز شهرینده دارا چکیرلر. او گون آذربایجان خالقینین عومومی عزا گونو ایدی.

میللی نهضتیمیزین و دئموکراتیک ادبییاتیمیزین گؤرکملی قوللوقچوسو اولان فیریدون ایبراهیمی آزادلیقلا اسارت آراسیندا گئدن دؤیوشون گؤرکملی قهرمانلاریندان و یئنی نسلین موباریزلریندن بیری اولموشدور. ائله بونا گؤره ده اونون خاطیره سی 21 آذر نئهضتیله ابدی له شیر و ابدی له شه جکدیر. بئله نقل اولونور:

شاهین قوشونو مییانایا یاخینلاشمیش گونلر ایدی. بیریسی تله سیک اوتاغین قاپیسینی آچیب ایچری گیریب دئدی: " تئز اولون ایندی قیز کؤرپوسونون پاتلاماسیندان یئتیشیرم، دورون گئده ک. میللی حؤکومتین دادیستانی اولان آستارالی فیریدون ایبراهیمی سوروشدو: هارا؟ دئدی: او تایا. ایبراهیمی جاواب وئردی: بو تایدا کی هله بیز روسلارین الینده دئییلدیک بیزیمله نئیله دیلر کی ایندی اونلارین اووجونا گیره ک. من بیلیره م کی بوردا باشیما نه گله جکدیر، آمما من اؤز یوردومدا قالیب جانیمی اونا قوربان وئره جه یم. ایبراهیمی قالدی و تبریزده گولوستان باغیندا دار آغاجی آلتینا گئدنده سورمئیی کوت- شالوار گئیمیش و یاخاسینا قیرمیزی گول تاخمیشدی.

توپلانما یئری : تبریز- امامیه قبریستانلیغی- فیریدون ایبراهیمىنین مزاری اوستو