آذربایجان دموکرات فرقه سینین ۶۰ ایللیی مناسبتی ایله کئچیریلن تدب

آذربایجان دموکرات فرقه سینین ۶۰ ایللیی مناسبتی ایله کئچیریلن تدبیر      ۲۰۰۵- جی ایل سنتیابر آیینین اوچو ایرانلی مهاجیرلر جعیتینین مرکزی بیناسیندا آذربایجان دموکرات فرقه سینین ۶۰ ایللیی مناسبتی ایله تدبیر کئچیریلدی. ییغینجاقدا مختلف اؤلکه لردن، او جمله دن تورکیه، ایران و باشقا یئرلردن  قوناقلار و ژورنالیستلر اشتراک ائدیردیلر.         تدبیری آذربایجان دموکرات فرقه سینین صدری امیرعلی لاهرودی آچیق اعلان ائتدی. او ۶۰ ایل بوندان اؤنجه آذربایجان دموکرات فرقه سینین یارانما ضرورتی، بو تشکیلاتین فعالیتی نتیجه سینده یارانان آذربایجان ملی حکومتی حاقدا و او دؤورون بین الخالق وضعیتینه داییر گئنیش چیخیش ائتدی. همچینین فرقه صدری اؤز نطقینین داوامیندا قید ائتدی کی، ۱٩٤۵- جی ایلده قورولان ملی حکومت بیر ایل فعالیتی دؤورو آذربایجاندا اقتصادی، سیاسی، اجتماعی و مدنی ساحه ده درین ده ییشیکلیک و کؤکلو اصلاحات آپاردی. ائله اصلاحاتلار کی، هئچ واخت اونون ایزی آذربایجان تاریخیندن سیلینمه ییب، نسیلدن نسیله خاطرلاناراق یاشایاجاقدیر.      او اؤز چیخیشیندا آذربایجان ملی حکومتین مغلوبیت سببلرینه و بو حکومتین دئوریلمه سینده خارجی عاملین یعنی امپریالیست دؤلتلرین خصوصی رولونو وورغولایاراق بیان ائتدی کی، «تاًسفله ارتجاع مرکزی اولان تهران یئنه ده مشروطه انقلابی، خیابانی حرکاتی و باشقا حرکاتلار کیمی ۲۱ آذر حرکاتینیدا خارجی دؤلتلرین گؤستریشی اساسیندا، خصوصی ایله آمریکا باشدا اولماقلا دئویردی، آمریکا ژنراللاری شوارتسکپ و رئدلینین رهبرلییی آلتیندا مرتجع شاه قوشونلاری ۱۵- جی دؤور ایران ملی مجلسینه سئچکی بهانه سی ایله آذربایجانا هجوم ائتدی. یئنه ده آذربایجان خالقینا دیوان توتولدو. اون مینلرله آذربایجانین قهرمان و مبارز اؤولادلاری اؤلدورولوب، سورگون ائدیلدی. مینلرله مبارز فدائی و فرقه عضولری اؤلکه نی ترک ائتمه یه مجبور اولدولار. بو گون بوارایا توپلانان ۲۱ آذر حرکاتینین قوجامان اشتراکچیلاری بو تاریخی حادثه نین جانلی شاهدلریدیر».      آذربایجان دموکرات فرقه سینین صدری ٨ ایلل سید محمد خاتمی حکومتینین فعالیتینی ایران اسلام جمهوریتینین ۲۷ ایللیک تاریخینده مثبت دؤور کیمی قیمتلندیره رک قید ائتدی کی، ٨ ایل مدتینده نسبی صورتده اؤلکه ده آچیق بیر فضا یاراندی. مختلف ملی و دموکراتیک مطبوعات اورقانلاری و کتابلار نشرائیلدی. آزاد شکیلده   دؤلتین چاتیشمامازلیقلاریندان تنقید اولوندو. آذربایجان دیلینده بیر چوخ قزئت، ژورنال و کتابلار چاپ ائدیلدی. مختلف ملی- مدنی اوجاقلار و درنکلر یاراندی و بودا اؤلکه ده یاشایان ملتلرین ملی شعورونون یوکسلمه سینه سبب اولدو. لاکین خاتمی حکومتینین دؤورو سونا یئتدی. یعنی اصلاحات حکومتینین عؤمرو باشا چاتدی. محمود احمدی نژاد اقتیدارینین دؤورو باشلاندی. آرتیق بو حکومتی «اصولچولارین حکومتی» آدلاندیرماق اولار.      بو حکومتین گلیشی ایله بیر چوخ آذربایجان دیلینده چیخان نشرلر باغلاندی و سایتلار فیلتر ائدیلدی. او جمله دن آذربایجان دموکرات فرقه سینین اینترنت سایتینادا فیلتر قویولدو. او چیخیشینین سونوندا دنیادا اقتصادی انتگراسیون و قلوبالیزمین گئنیش وسعت آلدیغینی وورغولایاراق قید ائتدی؛ «بو گون چوخ ملتلی اؤلکه لرده ملتلره ملی حاقلارینی الده ائتمک اوچون گئرچک شرایط و اساسلی زمین یارانمیشدیر. آرتیق افغانستاندا و عراقدا فدرال دؤلت یارانمیشدیر. بو پروسئس منطقه ده باشلانمیش، ایراندادا فدرال یا ملی مختار حکومتدن دانیشانی جزالاندیرمیرلار. واختیله بو سؤز آغیر جرم ساییلیردی. آذربایجان دموکرات فرقه سی ایراندا  فدرال قورلوش یارانماسینی قارشیا مقصد قویموشدور. بو ایستک بو گونگو دنیانین تاریخی ریاللیغی دیر.      بیز دموکراتیک ایراندا باشقا ملتلرله یاناشی برابر حقوق اساسیندا یاشاماق ایسته ییریک، اونا گؤره کی، اوزون تاریخ بویو تورکلر، فارسلار، کوردلر، عربلر، بلوچلار و باشقا خالقلار اؤلکه نی خارجی دوشمنلردن قوروموش و مشترک مدنیت یاراتمیشلار».          ییغینجاق اشتراچیلاری بیر دقیقه سکوتلا ۲۱ آذر حرکاتینین شهیدلرینین، هابئله دونیاسینی ده ییشن بو حرکاتین فدائی و اشتراکچیلارینین خاطره سینی یاد ائمک اوچون اؤز درین حرمتلرینی بیلدیردیلر.      تدبیرده ایوب نمینی آذربایجان دموکرات فرقه سینین مراجعتنامه سینی، جلال زاهدی آذربایجان دموکرات فرقه سینین یئنی پلاتفورمونو و علی ابوذر آذربایجان دموکرات فرقه سینین اینترنت سایتینین فیلتر ائدیلمه سی حاقیندا بیلدیریشی اجلاس اشتراکچیلارین نظرینه چاتدیردیلار.      تدبیرین داوامیندا ۲۱ آذر حرکاتینین اشتراکچیسی لطفعلی اردبیلی فرقه نین ۶۰ ایللیی مناسبتی ایله ییغینجاق اشتراکچیلاری و قوناقلاری تبریک ائده رک آذربایجان دموکرات فرقه سینین فعالیتیندن دانیشاراق، آشاغیداکی گؤرولن ایشلری نمونه کیمی اجلاس اشتراکچیلارین دقتینه چاتدیردی. او ۲۱ آذر حرکاتینین ۶۰ ایللیینه حصر اولونان «آذربایجان خالقینین آزادلیغی یولوندا مبارزلر» آدلی فتوآلبوم، سید جعفر پیشه ورینین آذریایجان رئسپوبلیکاسینین سیاسی پارتیا و اجتماعی تشکیلاتلار آرشیوینده ساخلانیلان الیازماسیندان ترتیب ائدیلن «خاطره لر» آدلی کتاب و «آذربایجان» قزئتینین یئنی دؤورونون(بئشینجی دؤور) نشر اولونماسی آذربایجان دموکرات فرقه سینین گؤردویو ده یرلی ایشلردندیر. همچنین او، خصوصی ایله بو ایشلرین گؤرولمه سینده فرقه ده چالیشان گنجلرین رولونو قید ائدی.      اجلاسین سونوندا یدالله نمینلی قطعنامه لایحه سینی اجلاس اشتراکچیلارین دقتینه چاتدیردی. قطعنامه بیر سسله قبول ائدیلدی. بئله لیکله ۲ ساعت داوام ائدن تدبیرسونا چاتدی.